SIAHA LATEST NEWS
** Atanoh nochho dawh 12:00 pa liana khata Puhpa.Lalhmingliana, MP ( Rajya Sabha) chhithana ry liata District Vigilance and Monitoring Committee hneipa acha. He Distrcit Vigilance & Monitoring Committee liana hata Siaha District liata Department nano nanopa, DRADA, BDO(Siaha nata Tipa), PHE Department, PWD Department, District Agriculture Office nata District Horticulture Officer zy tawhta ama hmalana report zy nathliepa acha hleikho ta reipahmaohpa acha.
He meeting liana heta Project Director, DRDA chata DRDA hmalana nata ama rai chhachabahpazy report piena daihti hnei ta. A report liata apalasana dahta, Thotlah khih zy hmapasiesa nawpa ta Central Scheme ama hria ngahaipa SGSY, NREGS,IAY,IWDP nata IWMP hmalana zy nathliepa acha.
Ko 2009-2010 chhota DRDA Department Financial Statement liata Alana dahta cha he hawna heta Scheme hro hropazy hma pa acha haba.
NREGS chata Ko 2009-2010 chata Central tawhta soh hmopa zydua cha 1580.52 lakhs chata. He Scheme tawhta soh hmapapuapa zie cha 1686.426 Lakhs acha. No 100 ahlaona (Job Card) liata arohpangiapa zie cha odyh 12238 cha ta. Ko 2009-2010 chhota No 100 ahlaona apatlo chiehpa Ody zie cha dyh 7059 cha eita, No 99 ahlaona pie chiehpazy cha Odyh 5179 ama cha.
He hleikho ta, Ko 2009-2010 chata Central sawkha ta BRGF chata soh a release ha chiehpa cha 912.00 Lakhs cha ta, He chata soh achhuanohpa cha 917.584 lakhs a cha. He Schemes liata ko 2009-2010 so hmapapua chiehpa cha 884.02 lakhs chata. Closing Balance liata 33.364 Lakhs ay ngahai. He Schemes chana heta Central Sawkha ta 2nd Installment Rs.2.35 Crore a release ha hra. He hleikho ta DRDA Financial Report, Schemes nano nanopazy chhao report nathliepa acha hleikho ta reipahmaohpa a cha hra.
Tipa BDO nata Siaha BDO zy tawhta chhao ama Department hmalana nano nanopa zy nata Soh ama hmana nata amah ma awpa chhachabahpa ay pazy rein a nata reipahmaona hneipa a cha hra.
He District Vigilance & Monitoring Committee liana heta Central Schemes ahriatuhpa Department hro hropazy ama kip ha kaw. Zala dawh 1:30 pm pa liana khata hlatloh kawpa ta pachhasapa a cha.
** Tari no 1.6.2010 Hriatuanoh khata ECM Music School cha pahypa acha haw. Atako ECM Assembly-ta apathlupa hawta Siaha liata Music School pahypa cha mawsy tahpa cha, zakhahnia Hriatuano khata Rev.Dr.M.Zakonia Moderator Elect, ECM Hqrs ta apahy. He Music School pahyna daihti ahmahpa he Rev.Thylua Hlychho, Executive Secretary ta chhitha ta, He Music School liana heta Grade 1,2,3,4, taihta achuna ay thei aw tahpa areih. Puhpa.Welborn Manner cha He music School Instructor cha ta, Puhpa.Lalhruaia cha Asst.Instructor acha hra. He Music School liana heta a eikhana liata Chyhsa 15 achu theina cha aw. Palai via laih awpa acha aw. He Music Shool liana heta Thla 6 Course achu thei awta. He tawhta ahlaotlohpazy cha London tawhta Certificate ama vaw pie tyh aw. He Music School liana heta International Level Musical Instrument zy chhao aki kawta. Atahma he Puhpa.Chasa-O New Colony cha he School chana heta tloh eita. Atanoh la tawhna khata Student nazy ta Music he ama chu pathao.
** Zahnia Tari noh 3.6.2010 pakhyno tawhna khata Public Health Engineering Department, Siaha WATSAN Division zy chata Saniatation Tank thotlah khi VC nazy hnota ama raih pathao. He Saniatation Tank ama raipa he, Comode, Pipe natah Ie-o chhaichhi zy a cha. He hawta PHE Department zyta Sanitation Tank BPL chhokhanazy chata ama raina chhapa he moto hri-ia pathaina avawpha via theinawpa nata Sawkha pipa ta Thotlah lata apahrapazy Hri-ia pathaina apache peimawh zie ala ngasa tahpa PHE Department biehneituhpazy chata ama reih. He Sanitation Tank he a eikhana chata Thotlah lata khi atlyhpa khi 17, Kiasie,Theiva,Chapi,Lodawh,Lope,Miepu,Phusa,Siasi, Tipa Diary, Mobyu, Mobyu vaithie, Lozuacho, Fungkah, Tisopi, Thosai, Vartekkai nata Phalhrang zy ama cha. Zahnia la liana khata Sanitation Tank alapa he chyh kaw eita. Atano la deikua ama la pha kaw tahpa pahnopa acha. PHE Department biehneituhpazy reina dahta he Sanitation Tank he thlaita Town chho BPL Chhokhanazy hnota raipa acha hei aw. Tah Pata NSV News ama chho.
** MJA Siaha Distric zy chata Siaha District zawpi zyta kao nano nano pa liata rairuna eima tyh ngapazy pathla nawpa ta thapi phia pata hmala awpa ama chhua.
BSNL Mobile Signal achhie kawpa chochah liata MJA Siahazy chata hmala eita, atahmata Siaha liata BSNL khaw hma ngahaipa he ERLANG 17.5 he atatawpa achapa vata athatlo hleikho ta Signal Overload haba ta, he vana he ta BSL biehneituhpazy cha zawpi zyta BSNL Mobile Signal pha kawpa eima hma theinawpa ta biehneituhpazy cha khaw pha viapa bo awpa ta ama haw. He hawta MJA nazy ta ama hawnapa he BSNL biehneituhpazy chhaota ama pacha peimaw kaw. Tahpa NSV News chata bie adaoh.
MJA Siaha Dsitrict nazy heta BSNL Mobile Signal chochah hleikho ta, State Bank of India Siaha Branch liata Counter achyh kawpa vata zawpi, SBI adaohtyhpa zyta rairuna hlupi atyh tyh eita, rairuna athla theinawpa ta SBI Biehneituhpazy cha Siaha su liata ATM pahy awpa ta ama haw. He ama hawna he atako chhota hlao atloh nata ama hnabeiseih zie MJA Siaha zy chata NSV News ama chho.
** Meisatla zawpi Join Village Action Committee zy chata zahnia la liana khata ama Vaih meisatlah VC pachhai pachhuahpa kholeina pamosana lathlo ama chhih. Meisatla zawpi zy heta Meisatlah Check Gate tawhta Bazar Traffic Point taihta lathlo he ama chhi. Meisatlah vaih zawpi, VC pachhaipachhuahpa akho leipazy heta Meisatlah VC pachhai pachhua ama kho leizie awh eita, Poster liata VC pachhai ama kho leizie achohna nano nanopazy ama chaba.
Meisatlah Join Village Action Committee zy heta zahnia kha Press Release papua eita, ama press release liata alaluah viapazy vaw palasatua eisila.
1. Mara Autonomous District Council , Executive Meetitng zachhih kawpa ta eima vaih Meisatlah Village Council sun 2 lata pachhaih awpa ta bie avaw pathlu hapa nata apachhaihna Order taih avaw papua thla hapa he eima vaih chho loraohna aparaotuhpa hawta pacha pita pei eima tata, apyh thei mapi.
2. Vaih chho liana NGO’s nata Awnanopazy chhaota tahma he Meisatlah chho liata VC pachhaih awpa he adaih ma leipa ta eima pahno. Tahpazy nata Point hro hropa zy acha. Meisatlah JVAC zyta palotlah leina lathlo ama china lia heta member apuapa ama hluh kaw. He hawta achanona heta Distric Council biehneituhpa zy ta kheita ma Meisatlah VC pachhaina chocha liana heta biechhana ama tao tahpa pahnopa cha mah vei. Chyhsa thokhazy pachana dah liata cha ama Order papua chiehpa he ama palakhei na ta ama pangaisa.
He hawta acha nona hete Meisatlah VC Pachhaih kho leina JVAC zyta ama chhi nona heta Mara District Youth Congress Committee Hqrs, Siaha zy ta VC Pachhaina chochah liata Press Release papua hra eita. Ama Press Release liata ama palsana dahta cha:-,
1) MDYCC ta cha , tahma tawhta Village Council Court pachhai hluh via awpa ta khona ayna chhapa he khitlah ativyu eisala, hmasiena ama hnei via theinawpa hleikho ta Development alo pangia hlu via thei nawpa ta khokheina acha pa hawta MDYCC zy chata ama reih.
2) MDYCC ta cha JVAC ta lathlo ama china chhapa he MDF & MNF Coordination zyta Rulling hmotaopa hrohra ta kholeina vata hehawta lathlo achhipa hawta MDYCC chata pachana ahnei tahpa ama Press Release liata ama reih.
