SAIHA BI-WEEKLY NEWS ROUND UP
## COUNCIL VENG YMA LEH YLA TEN AN VENG CHHUNG ZIRLAI TITHA TE CHAWIMAWINA AN NEI.
Tahrik ni 4 Nizan khan Council veng, Saiha YMA leh YLA te tangkawpin an veng chhunga kumin HSLC leh HSSLC hlawhtlingte chawimawina prog. changtlung tak- DIC Confrence Hall saiha ah neih a ni.
Chawimawina an hlan hi HSLC ah mi 22 leh HSSLC ah mi 15, a vaiin mi 37 niin Certificate mawi tak hlan an ni. He Chawimawina inkhawm hi Pu Hmingtinthanga President YLA Br. Council vengin a kaihruaia, Pu B.Lalrinliana Senior Adviser YMA Br. Council veng leh Pu Sanghnuna Sr. Adviror YLA Br. ten
zirlaite hnenah thuchah an sawi bakah Pi Lalremliani MHIP Pre. Council veng leh nu leh pa te aiawhin Pu J.Lanuntluanga ten thusawina an nei bawk. He Zirlai hlawhtling te hawimawina prog. ah hian zaithiam tak ten hun an hman bakah Band group te pawhin mipui an tihlim bawk a, Zirlai hlawhtling Saiha a la awmte bakah Nu leh pa, YMA leh YLA member an tel thahnem hle. Hetiang Prog. hi hmanfo chi leh zirlai te leh veng chhung inpumkhatna leh intihphurna te, infuihtharna atana thil tangkai tak anih thu uar taka tarlan a ni bawk.
## MIZORAM INTER DISTRICT U-16 FOOTBALL TOURNAMENT VAWI 8-NA SAIHA AH TAN A NI.
Mizoram Inter District U-16 Football Tournament, MFA buatsaih chu nimin chhun dar 12:00noon khan District Playground Saiha ah Pu S.Hiato bialtu MLA & Minister PHE etc. chuan a hawng. Minister chuan Saiha hmunah ngei Mizoram huap tournament buatsaih a ni chu lawmawma tiin MFA leh SDFA te chungah lawmthu a sawi a, Mizoram thalaite infiamna lamah kan thangharh nasa hle ,a Mizoram Sorkar pawhin Sports lamah thiehtawpin hma a la mek zel a, kan rama zu lehruihhlo kan thalaite min suat thintu hi infiamna hmanga kan umbo a hun tawh a ni tiin, infiammite chu inthlahdah lova Mizoram a champion mai rilru pu lovin National leh Intrenational rilru pu chunga inbuatsaih tura chahin, ruihhlo umbona kawnga kawng kawhhmuhtu leh hmala tu ni turin a chah a, District hrang hrang atanga infiammi lo kalkhawm te chu duhsakna a hlan nghal bawk.
He Tournament hawnna inkhawm hi Pu L.Mahu Sr.Vice Pre. SDFA in a kaihruai a, Pu hmingthanzauva Pachuau Pre. SDFA in welcome Adress neiin thutiam laktir an nih hnu ah he U-16 tournament hi tan nghal a ni a, Saiha District leh Kolasib District ten first match khelin Saiha in Kolasib hi 4-1 in an hneh. He inkhelh ah hian saiha distrct tan David Lallianzauva, Beirangia,Zohmingliana ten minute 90 chhungin goal 1 theuh an thun a, minute 2 hun pek belhah Substitute Lallungmuana’n a vawi khat ball khawihnaah penalty corner atangin Saiha tan hian Goal 1 a thun belh a, hun a tawp zui a ni. Kolasb District tan hian Lalduhawma’n goal 1 a thun ve hram a ni. He Tournament ah hian Aizawl, mamit leh Serchhip Dist. aiawh an rawn tel thei lova, District dang panga, Lunglei, Champhai, Kolasib, Lawngtlai leh Saiha District ten League in an inkhel dawn a ni.
Vawiin chhun dar 2:30pm atang khan inkhelh hi chhunzawm leh a ni a, Champhai leh Lunglei, Kolasib leh Lawngtlai an khelh a, result erawh chanchin buatsaih lai hian kan hre hman ta lo.
## MDCC ASSEMBLY VAWI 19NA NIHNIH AWH ROPUI TAKA HMAN A NI.
Mara District Congress Commitee(MDCC) Assembly vawi 19na ni hnih awh tur chu nimin chawhma dar 10:30am khan Laila Hall Saiha ah tan a ni a, Pu S.Hiato Minister i/c PHE, Tourism etc. chu khuallian niin he Assembly hi a hmanpui. Khuallian Pu S.Hiato Minister chuan Mara ram mipuite kan rama Development nasa tak lo kal mekte hi chhungkaw intodelhna atana hmang lova tun ang renga kan kal a nih chuan kan hmabak a thim hle a, NLUP kan hman tur hi kan chhungkaw intodelhna atana kan hman a dinchhuah pui ngei kan tum a tul ani, a ti. Minister chuan Congress Party chu tluchhe thin mahse Pathianin kan ram din tha leh turin a hruaichhuak leh thin a ni, a ti. Mara ramin Centenary malsawmna kan dawng nasa hle a, hmasawnna tam takin min tuam mek a ni tiin kan tawngtai chhuah he sorkar hi dik taka a kal zel theih nan i tawngtaipui zel ang u, tiin Assembly palai kalkhawmte chu ram tan dik tak leh rinawm taka thawk tura inhlan thar leh turin a chah a ni.
He Assembly hi Pu Ng.Silla President MDCC in a kaihruai a, Aizawl atangin MPCC aiawhin Pu Hiphei Vice Predent MPCC leh Pu S.Khipo CEM MADC te pawhin in thusawina an nei bawk a, He Assembly ah hian Report ngaihthlak a nih bakah kum khat chhunga Congress member boral ta mi 20 te sunna hun hman a ni bawk. Assembly hi naktukah chhunzawm leh ani ang a, hruaitu thar thlanna neih nghal a ni ang. He Assembly ah hian Palai an kal thahnem hle a, Hall hian a lenglo hial a ni.
Vawiin lam khan Mdcc Election neih a ni a, Official candidate te chu uncontest a thlantlin vek an ni a, official candidate thlantlin te chu hengte hi an ni:-
President :- Pu RT. Zachono, V/Pre. :- Ng. silla
Senior V/President ;- TT. Vakhu, Tresurer :- N. Zakhai. Heng te bakah hian executive member 25 an thlang nghal bawk.
## NI 3 CHHUNG AWH TUR CENSUS SUPERVISOR LEH ELUMINATORS TE TAN CHHIARPUI CHUNGCHANG TRAINING NEIH A NI.
Tunkar thawlehni khan census training hi DC’s conference hall ah neih a ni a, training hawnna inkhawm hi Pu Donny Lalruatsanga, BDO & Charge Officer. RD Block Saiha chuan a kaihhruai a, Pu V. Lalengmawia, S.D.D(s) Saiha chuan thu sawiin census pawimawhziah leh sawrkar planning zawng zawng te pawh census hmanga siam vek a nih thu a sawi a, census hi kum 1872 atangin India ramah neih tan a nih tawh thu leh census lo neih tawh dan hrang hrangte bakah he thilin a kaihhnawi dan leh hrai chi hrang hrangte, dan bawhchhiate hremna pek an nih theih dante pawh a sawi lang bawk. Tun tum census ah hian kum dang a tih ngai lo National Population Register(NPR) neih thar a nih dawn thu pawh sawi langin census neih dawn a hriat tur pawimawh chi hrang hrang leh hming ziak danah pawh fimkhur a pawimawh thu a sawi bawk.
Training hi nimin pawh khan chhunzawm leh a ni a, vawiin khan zawhfel a ni.
= New Colony VC 1,II LEH III huam chhunga Village Health Sanitation Committee te chuan mipui hnenah hriattirna leh ngenna thuchhuah siam in, an thuchhuah ah huan hetiang hian an tarlang:- “New Colony VC I,II & III Village Health Sanitation Committee hmalaknain khawchhung thenfai hnatlang vawi 2 thawk a ni tawh a, a tul dan angina thawk chhunzawm zel a ni ang. Tin, hnatlang thawk laia Motor rawn thawhtu EM LAD leh EE PWD chungah VHSC chuan lawm thu a sawi tak zet a ni.
Chhungkaw tinin faina leh thianghlimna ngai pawimawh theuh turin New Colony VHSC chuan a ngen che u. Faina leh thianghlimna chuan hriselna, hlimna leh zahawmna a keng tel a ni tih hriain, bawlhhlawh khawlaiah te Sidedrain ah te, luikawrah te paih mai lovin Dust Bin ah paih ila, halral thei chin chu halral nghal zel ang u. Kan district khawpui Saiha I vawng thianghlim ang u,” tiin hriattirna an chhuah.
= NSV leh Saiha district gamers Asscoiation buatsaih FIFA 2008 Computer Games Competition chu khelh mek zel a ni a, nizan atang khan 2nd round khelh tan a ni. He competition hi NSV chuan zan tin Live telecast in a pe chhuak thin a, mipuiin an hlut hle.
Hetihlai hian NSV leh MADC Education Department tangkawp chuan tun thla may 18 atang khian Words Speclling Competition a buatsaih dawn a, inpuahchahna pawh ngawrh taka kalpui mek zel a ni. Tun tum words Spelling Competition ah hian MADC enkawlna hnuaia Primary School naupangte tan chauh buatsaih a ni dawn a, words spellimng chauh ni lovin quiz pa 2 zel tel a ni bawk ang. lawmman tha tawk tak pakhatna atanga pathumna thleng siam sak a ni ang.
= Tunlai hian saiha District leh a chhe velah damlohna tlang hrileng an tam hle a, a bik takin naupang damlo an tam hle. Saiha Civil Hospital ah naupang damlo tam tak admit an ni a, admit lo in lama inenkawl zui te pawh tam tak an awm bawk. Naupang damlohte hi khawsik sang thut avanga kaih, khuh leh awmna an tam ber a ni.
= Nigeria president vui liam a ni ta. Lung lam that lohna avanga hun rei tak damdawiina enkawl a ni hnuah ziahawm lam a pan theih lo avangin Nimin nilaini khan Nigeria president Umaru Yar’Adua, chu nimin nilaini khan a boral a, vawiin nilaithawhtanni khan a pian leh murna khua katsina ah ropui takin vui liam a ni.
Kum 58 a upa yar adua hi nikum november thla atang khan lunglam that lohna avangin Saudi Arabia ah in enkawl turin a kal a, kumin February thla khan nigeria ah rawn let lehin a natna hian ziahawm lam a pan chuan lo avangin aiah Vice President Goodluck Jonathan chu nigeria ram hruaitu lailawk tura ruat a ni.
Yar’Adua hi kum 2007 khan in thlan chungchangah sawiselna nasa tak karah president atan thlatlin a ni a, south africa ram chhunga remna leh muanna a awm theih nana hmalakna kawngah a thawh hlawk hle.
Nigeria president thi thu hian khawvek a dengchhuak nghal a, ram hrang hrang hruaitu luten uina leh tuarpuina thu an thawn sup sup a, us president barack obama pawhin uina thu thawnin ‘ nigeria chuan hruaitu ropui tak in chan a ni, a ti.
Nigeria president boral ta Yar’Adua,, hian nupui pa 2 neiin, fa 9 a neih a ni.
